Që prej ditës së diel, vendet evropiane kanë nisur vaksinimin ndaj virusit SarsCov2. Dozat e para të vaksinës e BionTech/ Pfizer janë injektuar tek individët e parë sipas një liste që kanë përcaktuar autoritetet shëndetësore, ndërkohë që të gjitha shtetet kanë përcaktuar saktë të gjitha kategoritë prioritare.
Italia dhe Greqia si dy vende fqinjë me Shqipërinë e kanë vaksinuar njerëzit e parë. Kujtojmë se Italia ishte shtetit i parë perëndimor që në 21 shkurt raportoi rastet e para me Covid-19 dhe që prej fillimit të pandemisë ka shënuar shifrat më të larta në Evropë dhe e pesta në botë duke numëruar mbi 70 mijë e 900 vdekje.
Në një lidhje “Skype” nga Italia për “Wake Up” mjekja nefrologe, Evelina Skënderi bëri të ditur se muajt janar-shkurt do të vaksinohet stafi mjekësor dhe të moshuarit, ndërsa në mars do nisë procesi për pjesën tjetër të popullsisë.
“Koha për të vaksinuar popullatën është e gjatë. Duhen dy doza në një kohë 3 javësh nga njëra te tjetra. Kështu që duhet të jemi të përgatitur që akoma, për muaj të tërë duhet të respektojmë të gjitha rregullat e pandemisë.
Ajo që pritet të ndryshojë e para është situata e spitaleve, duke vaksinuar atë shtresën e popullsisë që është më në rrezik, të moshuarit dhe kështu do të lehtësohet situata edhe në spitale.
Në Itali është vendosur se kategoria e parë që do të vaksinohet janë punonjësit shëndetësore dhe të moshuarit në qendra me gjithë personelin e tyre.
Gjithashtu edhe të moshuarit mbi 80 vjeç. Mendohet se këto dy muajt e parë, janari dhe shkurti do të shërbejnë për të vaksinuar këto dy kategori. Në mars fillojnë kategoritë e tjera”, sqaroi mjekja
