Moti i keq ka goditur Japoninë.
Shteti aziatik është përfshirë nga një stuhi e madhe dëbore, duke shkaktuar probleme të mëdha në vend.
Të paktën 1 mijë automjete u bllokuan në autostradën Kanetsu, e cila lidh kryeqytetin Tokio me qytetin verior të Niigata.
Dëbora e cila nisi të mërkurën në mbrëmje ka shkaktuar bllokime të shumta trafiku përgjatë gjithë rrugës, ndërkohë që autoritetet kanë shpërndarë ushqim, karburant dhe batanije për personat e ngecur. Ajo ka lënë gjithashtu më shumë se 10,000 shtëpi në veri dhe perëndim pa energji elektrike.
Bllokimi i trafikut ishte shtrirë deri në 16.5 km (10 milje) përgjatë autostradës. Zyrtarët kanë përdorur makineri dhe punë fizike për të tentuar lirimin e rrugës, gjithsesi 1 mijë makina mbeten të bllokuara prej mesditës së sotme (e premte 18 dhjetor). Sipas agjencisë meteorologjike moti i keq pritet të vazhdojë edhe gjatë fundjavës, ndërkohë që temperaturat e këtyre ditëve janë ndër më të ulëtat në historinë e Japonisë.
Stuhia e borës vjen ndërsa Japonia po lufton me një valë të tretë të rasteve të koronavirusit, e cila ka ushtruar presion të paparë në spitalet e vendit.
