Një efektiv policie i forcave të FNSH-së në Shkodër është ekzekutuar me armë zjarri mëngjesin e sotëm në aksin rrugor Lezhë-Milot, në zonën e Gajushit. Viktima Xhulio Prela,26 vjeç, ka qenë duke lëvizur me makinë në momentin që është ekzekutuar me armë zjarri rreth orës 3 të mëngjesit të sotëm. Pas ekzekutimit të Prelës, makina tip “Volkëagen” ka dalë jashtë rruge duke përfunduar në një parcelë aty pranë.
Për ngjarjen policia është njoftuar se një makinë kishte dalë nga rruga, në aksin rrugor Milot-Lezhë, në Gajush, por në momentin e mbërritje panë se Prela ishte i ekzekutuar më armë zjarri, çka kishte sjellë dhe daljen e mjetit jashtë rrugës.
Xhulio Prela ishte me origjinë nga Puka dhe ishte student në Akademinë e Policisë Tiranë në vitin e 3-të.
Prela ka punuar dy vite në Komisariatin e Policisë Lezhë, ndërsa prej një viti ishte transferuar në FNSH-në Shkodër!
Trupi i viktimës është dërguar në morgun e spitalit të Lezhës, ndërsa policia ka ngritur një grup i posaçëm hetimor me qëllim identifikimin dhe kapjen e autorëve.
Gjithashtu FNSH Shkodër dhe forcat speciale RENEA, kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen.
