Pandemia që preku mbarë botën mori shumë jetë njerëzish. Virusi nuk kurseu bluzat e bardha, ata që ishin në frontin e parë për të ndihmuar të gjithë pacientët që infektoheshin nga Covid-19.
Që nga fillimi i pandemisë e deri tani, në vendin tonë kanë ndërruar jetë si pasojë e Covid-19, 17 mjekë, infermierë dhe farmacistë.
Emisioni “Shqipëria Live” ka vendosur që ditën e sotme tua dedikojë këtë puntatë pikërisht atyre që humbën jetën nga Covid-19, të cilët po bënin ta pamundur që të shpëtonin pacientët, por humbën vetë betejën me këtë virus.
Mjekja kirurge, Zyliha Kraja në moshën 78-vjeçare ndërroi jetë nga koronavirusi. Edhe pse prej vitesh ishte në pension ajo sërish ka vijuar të kontribuojë në spitalin e Shkodrës.
Në lidhje të drejtpërdrejtë nga Shkodra ishte bashkëshorti dhe vajza e të ndjerës, Fadil Kraja e Nerejda Kraja Llazani.
“Të shërbesh 56 vjet një profesioni, ajo ishte një martire e kirurgjisë në Shkodër. Ishte e para dhe e vetmja kirurge në Shkodër. Një nga 3 më të vjetrit në Shqipëri. 22 mijë jetë njerëzish kanë kaluar në duart e saj, e çfarë duhet të bëjë tjetër një njeri që të shpallet “Nderi i Kombit””, tha ai.
Sipas Fadilit, ajo edhe pse ishte në pension, nuk i ndal kurrë dhe punonte fort. “Edhe kur u shfaq Covid, ajo qëndroi në spital. Ajo u prek nga kjo sëmundje dhe ndërroi jetë. Ishte një humbje e rëndë për familjen dhe për kirurgjinë në Shkodër. Më la në kohën kur unë kisha më shumë nevojë për të. Shkodra dhe mediat i bënë jehonë dhe ishte një lloj ngushëllimi për ne”, tha zoti Kraja.
Ky i fundit shtoi se më shumë e ka rritur ai vajzën se sa e ëma. “Vajzën më shumë e kam rritur unë se sa ajo, ma linte në mes të natës dhe ikte, e ndoshta as nuk kthehej deri ditën e nesërme”, përfundoi ai.
Ndërsa e bija tha se nëna e saj ka qenë një grua shumë e fortë dhe e zonja, si dhe bëri jetën që donte. Ndërkohë meraku më i madh i saj ishte që të mos linte bashkëshortin e saj vetëm.