Në këtë kohë të vështirë pandemie ku të gjitha resurset e bluzave të bardha janë në angazhim maksimal për të përballuar fluksin e të prekurve dhe shpëtimin e jetëve të pacientëve. Në këtë luftë janë përfshirë edhe ekipet mjekësore të Forcave Ushtarake, ku përveç trajtimit të ushtarakëve dhe familjarëve të tyre ata janë kujdesur edhe për qytetarët e thjeshtë.
Personeli mjekësor i Forcave të Armatosura të Njësisë Mjekësore Ushtarake janë integruar në Spitalin e Traumës duke u përkujdesur për pacientët me COVID-19.
Kolonel Dr. Rushan Muhameti, drejtor i Njësisë Mjekësore Ushtarake shprehet se personeli është në krye të detyrës 24 orë në 24, jo vetëm në Spitalin e Traumës, por edhe në çdo repart e strukturë të Forcave të Armatosura.
“Nëse një i sëmurë është i dyshuar me COVID sa hyn kemi një dhomë ku izolohet dhe bëhen ekzaminimet dhe nëse rezulton pozitiv e çojmë në spitalin përkatës covid. Nëse nuk e lejon gjendja e pacientit transportin, ne i japim ndihmën e duhur pavarësisht risqeve dhe kemi pasur raste te tilla dhe kur pacienti ka dalë nga gjendja emergjencës është transportuar”, tha doktor Muhameti.
