Ekspertja e ISHP-së Silva Bino ka vënë theksin gjatë komunikimit të sotëm me mediat për situatën e COVID-19 tek ndërgjegjësimi i qytetarëve. Bino tha se është e rëndësishme të kuptohet realiteti i ri rreth nesh, se edhe një pakujdesi mund të jetë fatale për dikë vulnerabël.
Sipas saj masat anti-COVID do të zbatohen deri sa vaksina të ketë impakt.
“Ne pamë efikasitetin e bllokimit në atë moment dhe siç pamë rritjen e numrave kur protokollet nuk u zbatuan siç duhen. Masat e fundit nuk kanë intensitetin e bllokimit të madh. Janë masa me një intensitet mesatar. E rëndësishme mbajtja e maskës. Pavarësisht vendimeve që marrim, pavarësisht strukturave që i kontrollojnë e rëndësishme është që ne të kuptojmë realitetin e ri, ajo që ndodh rreth nesh. Një pakujdesi bëhet shkas për vdekjen e një të moshuari apo një personi vulnerabël. Të gjitha masat për parandalimin e COVID-19 nuk janë një shkencë e madhe, janë ato që ne kemi në dorë për momentin. Edhe në momentin që do kemi vaksinën kjo vaksinë mund të ndihmojë ata që janë më vulnerabël për të mos bërë forma të rënda por këto masa do zbatohen deri sa vaksina të ketë impakt mbi sëmundjen. Duhet të ndërgjegjësohemi. Impaktin e masave të fundit nuk mund ta shohim menjëherë. Sëmundja ka një periudhë inkubacioni që shkon deri në dy javë.
Jemi duke e monitoruar. E rëndësishme që së bashku me masa të tjera do donim të kishin impaktin e tyre në sheshimin e kurbës për momentin dhe më pas në uljen e saj. Forcimi i kapaciteteve të testimit ka ardhur si rezultat i shtimit të një aparature të re që do bëhet pjesë e rrjetit të institutit të ISHP. Kemi 4 laboratore që funksionojnë në rrjetin publik”, deklaroi Bino.
