Nga të dhënat e raportuara një ditë më parë nga Ministria e Shëndetësisë, vihet re një ulje e lehtë e kurbës për rastet ditore.
Nga 2044 testime, 410 prej tyre janë konfirmuar me Covid-19. Në hartën e rasteve aktive, kryeqyteti mban peshën kryesore si zona më e nxehtë e virusit dhe ku çdo ditë rezultojnë më shumë se gjysma e të infektuarve në rang vendi. Por jo më pak problematike në zgjerimin e hartës së kuqe rezultojnë edhe Durrësi, Elbasani, Shkodra, Fieri e Korça.
SITUATA NË SPITALE
Edhe spitalet Covid vijojnë të tejmbushen. Dje u shtruan dhjetë pacientë më shumë, duke e çuar numrin e atyre që kanë nevojë për trajtim spitalor në 373, një rekord i ri ky që kur u hap spitali Covid-3. Ministria bën me dije se 17 prej tyre janë në gjendje të rëndë, në terapi intensive, ndërsa tre në intubim, numër ky thuajse i paluhatur nga dita në ditë. Ndërsa fatalitetet dje u shënuan tetë, të moshave nga 65 deri në 80 vjeç.
“Me gjithë përpjekjet e mjekëve, në 24 orët e fundit kanë humbur jetën 8 qytetarë me Sars-Cov2 pozitivë në spitalet COVID: një 65- vjeçar nga Kavaja, një 68- vjeçar nga Kurbini, dy 76- vjeçarë nga Tirana, një 64- vjeçare dhe një 67-vjeçare nga Elbasani, një 74-vjeçar nga Kuçova, një 80-vjeçar nga Fieri”.
Në përballje me periudhën mbase më të vështirë të virusit, kur edhe përgjigja e tamponit vijon të vonojë me ditë të tëra, ministria lutet që qytetarët të vetizolohen me qëllim për të mos përhapur më tej virusin.
Linja e gjelbër apo numri i urgjencës është gjithë çfarë mund të ofrojë deri në diagnozën e saktë që përcakton mjekimin nga mjeku i familjes në bazë të protokollit që u ka nisur atyre vetëm në ditën e fundit të muajit që shkoi. “Ministria e Shëndetësisë dhe e Mbrojtjes Sociale u drejtohet të gjithë qytetarëve që janë të konfirmuar ose në pritje të përgjigjes së testit, të qëndrojnë të izoluar, duke respektuar detyrimin e vetëkarantinimit. Për çdo shenjë të sëmundjes duhet të kontaktoni mjekun tuaj të familjes”.
