Kryeministri Edi Rama iu bëri thirrje të gjithë qytetarëve të mos shpenzojnë lekë për ilaçe apo të përdorin oksigjenin vetë në shtëpi, kur janë me koronavirus, pa u konsultuar me mjekun e familjes.
Sa i përket propozimit të kryedemokratit Lulzim Basha për rimbursim të ilaçeve, Rama theksoi se qeveria po përgatitet që të futet për të mbështetur qytetarët, por sipas tij, nuk është një plan me afat.
“Nuk renditemi në vendet e papërgatitura, por në vendet e përgatitura. Nuk mund të imagjinohej dot kjo situatë me spitalet që gjetëm. Patjetër që në spitalet Covid, ju them dhe ju sfidoj, nuk ka gjë që e kanë të tjerët. Futuni në spitalet Covid dhe shikojeni. Sa i përket rimbursimeve, e para njerëzit duhet t’i referohen vetëm autoriteteve shëndetësore dhe të konsultohen vetëm me bluzat e bardha dhe të mos bëjnë shpenzime duke blerë ilaçe kot. Nuk është grip i zakonshëm, nuk trajtohet si i tillë, ka ilaçe specifike që vlejnë. Nuk vihet oksigjeni, sikur vihet gjella në pjatë. Në rastin e oksigjenit duhet patjetër asistenca e mjekut, nuk futet oksigjeni si supë, se mund të krijojë pasoja të rënda. Në atë listë të përcaktuar të mjekimit bazë, në kushtet kur nuk je për spital, ka një grup medikamentesh, ka një faturë, dhe sic e kemi parashikuar, jemi duke u përgatitur që të futemi për të mbështetur. Por nuk është një plan me afat, se nuk e dimë afatin e qëndrimit të këtij virusi. Nuk mund të nisemi me mendjen e Ilir Metës, që mes dy dëshmorëve bën një deklaratë, merret me dekorimin e të vdekurve dhe flet për qeverinë që po vdes gjithë dynjanë. Duhet të masim forcat dhe të matemi mirë financiarisht, që të jemi gati të mbajmë mirë këtë fron”, tha Rama.
