Kryeministri Edi Rama i ka bërë thirrje të rinvje dhe të rejave shqiptarë të t’i bashkohen Partisë Socialiste, teksa ka prezantuar në Durrës platformën që i jep mundësinë të shprehin ambiciet për t’u bërë deputetë.
Nga Durrësi, Rama nuk ka kursyer as sulmet dhe ironitë me dy partitë opozitare, tashmë në koalicion PD dhe LSI.
“E vetmja punë e mirë që ka bërë LSI”, tha Rama “është pikërisht të mbështesë PS-në në punët që ka bërë”.
“Nëse LSI ka bërë ndonjë punë të mirë, ka qenë pikërisht të mbështesë PS në punën që bënte, që thjeshtë të mos na dalë përpara dhe të na pengojë. Ndërsa sot janë bërë bashkë për të penguar Shqipërinë dhe për ta kthyer mbrapa, aty ku janë ata. Ata janë të humbur, ata janë të destinuar të degradojnë siç kanë filluar të degradojnë thellë e më thellë. Sepse shumica e shqiptarëve kurrë nuk mund t’i mbështesë ata. Por ne jemi këtu se kemi nevojë të përmirësohemi, të krijojmë më shumë mundësi për të rinj dhe të rejat. Ne jemi këtu t’i themi hajdeni, bujrum, hajdeni dhe na thoni që pse doni të jeni pjesë e skuadrës së 2021-shit dhe pse, çfarë ju shtyn”, tha ndër të tjera Rama.
