Një 40 vjeçar shqiptar ka ndërruar jetë mëngjesin e djeshëm në zonën e Skepasto, Kalavrita në Greqi, si pasojë e një aksidenti me motor. Rrethanat e aksidentit mbeten të paqarta, ndaj autoritetet e vendit fqinj kanë nisur hetimet.
Mediat greke nuk zbulojnë emrin, por publikojnë një foto të 40 vjeçarit me bashkëshorten dhe shkruajnë se ata kishin një djalë të vogël. Viktima është gjetur nga banorët e zonës i pajetë, mbi asfalt, me plagë të shumta.
Ai u transportua në Spitalin e Kalavrita me ambulancë, ku u shpall i vdekur, ndërsa oficerët e policisë informuan të afërmit e shqiptarit dhe gruan e tij, e cila është në gjendje shoku.
Deri më tani nuk është zbuluar se si ai humbi jetën në asfalt, ndaj drejtuesit e departamentit të Kalavrita po hetojnë të gjitha pistat e mundshme. Komuniteti lokal është i tronditur. Të njohurit dhe miqtë e tij nuk mund ta besojnë mënyrën në të cilën ai humbi jetën kaq shpejt dhe kaq padrejtësisht.
