Një fenomen i frikshëm, që sa vjen dhe bëhet më shqetësues, ka filluar të marrë përmasa gjithnjë e më alarmante në Shqipëri. E kemi fjalën për sherret që zhvillohen mes adoleshentëve, të cilat ndodhin brenda apo edhe jashtë ambienteve të shkollës. Një video tronditëse ka mbërritur së fundmi në redaksinë e JOQ Albania nga një fshat i Fierit.
Një grup djemsh, adoleshentë, dhunojnë pa mëshirë një bashkëmoshatarin e tyre. Të rinjtë nuk përmbahen teksa e godasin adoleshentin me mjete të forta, shqelma dhe grushta. Në një moment në video shihet se një nga djemtë tenton ta godasë me thikë viktimën e dhunës. Mes tyre nuk mungojnë as sharjet që për adoleshentët shqiptarë, tashmë, janë bërë pjesë e fjalorit të përditshëm.
Ngjarja është e rëndë dhe menjëherë duhet të reagojnë institucionet përkatëse. Policia duhet të merret seriozisht me rastin në fjalë dhe të mos e anashkalojë siç kanë bërë me shumë ngjarje të tjera. Veprimi i adoleshentëve duhet të dënohet maksimalisht, pasi fenomene të tilla po shkatërrojnë rininë në vendin tonë.
I riu i dhunuar në fund të videos shfaqet në gjendje të rënduar por nuk ka informacion mbi shëndetin e tij.
