Bujar Sejdinaj do të ekstradohet drejt Italisë. Ky është vendimi më i fundit i gjykatës së Tiranës që ka vendosur pro kërkesës së Italisë për ta ekstraduar. Sejdinaj i njohur me nofkën si xhaxahi i Ndraghetës ka lidhje me klanin mafioz Bellocco dhe është përfaqësuesi i mafies së fuqishme në Itali.
Ai u arrestua në kuadër të operacionit Magma që u zhvillua në disa shtete Itali, Shqipëri, Kosta Rikë dhe Argjentinë. 61-vjeçari në momentin e arrestimit i ka mohuar akzuat dhe se shprehet se profesionin e tij e ka marangoz. Pas vendimit të gjyqtarit Hoxha, Sejdinaj ka 10 ditë kohë të kundërshtojnë vendimin e Gjykatës, e cila zbatoi letërporosinë e mbërritur nga Italia dhe që u pranua nga ana e ministrisë së Drejtësisë shqiptare.
Sipas policisë shqiptare Bujar Sejdinaj, i cili ishte “Ambasadori” i “Ndragheta” në Ballkan, së bashku me një shtetas tjetër Shqiptar nga Elbasani, i quajtur Ardian Çekini, dyshohet se kanë marrë pjesë në blerjen e rreth 20 kg kokainë në Spanjë.
Këtë operacion ata e kanë kryer dhe me persona të tjerë me shtetësi Italiane, që besohet se janë pjesë e klanit mafioz “Ndragheta” në Itali. Në kuadër të dokumentimit të këtij rasti të blerjes së 20 kg kokainë në Spanjë, ditën e djeshme policia arrestoi për qëllime ekstradimi në Itali, dibranin Bujar Sejdinaj.
Ndërkohë më parë në 26 maj 2020 në qytetin e Elbasanit policia arrestoi, Ardian Çekinin, i cili për këtë rast ishte shpallur në kërkim nga autoritet e drejtësisë Italiane. Të dy këta persona janë arrestuar me urdhër të autoriteteve italiane dhe pritet që në ditët në vijim të ekstradohen në Itali, për tu përballur me akuzat e ngritura për trafik droge dhe përfshirje në organizatë kriminale.
“…Bujar Sejdinaj i quajtur “Xhaxhai”, përfaqësuesi i “Ndrangheta”-s në Shqipëri dhe në zonën e Ballkanit dhe në veçanti përfaqësuesi i familjes mafioze “Belloço”. Bujar Sejdinaj ka marrë pjesë në blerjen e rreth 20 kg kokainë në Spanjë. Arrestimi i këtij shtetasi është bërë me qëllim ekstradimin, ndërsa cilësohet si përgjegjësi i Ndraghteta-s në zonën e Ballkanit…”-thuhet në komunikatën e policisë Shqiptare.
