Dy persona janë arrestuar nga policia, në makinën e të cilëve kishte lëndë narkotike.
Në pranga kanë rënë T. K. 39 vjeç, banues në fshatin Theth dhe A. T. 23 vjeç, banues në fshatin Abat, Shkodër.
Burimet zyrtare thonë se është vërtetuar veprimtaria e tyre në kultivimin e lëndëve narkotike në Shkodër, Malësi të Madhe dhe Theth.
Ata janë konstatuar nga shërbimet e Policisë në fshatin Reç, duke transportuar lëndë narkotike dhe në momentin që është ndërhyrë nga punonjësit e policisë, mjeti tip “Renault” me drejtues shtetasin A. T., dhe pasagjer shtetasi T. K. ka tentuar të largohet më shpejtësi, por është ndaluar në ndjekje e sipër nga policia.
Pas ndalimit të mjetit dhe kontrollit të ushtruar në pjesën e pasme janë konstatuar dy çanta dhe një qese plastike me 8 kilogramë lëndë narkotike cannabis sativa, e cila u sekuestrua në cilësinë e provës materiale, së bashku me automjetin dhe 2 aparate celular.
Rezulton se në këtë veprimtari janë të implikuar edhe shtetasit GJ. L. dhe M. D., të cilët janë shpallur në kërkim.
Materialet iu referuan Prokurorisë së Rrethit Gjyqësor Shkodër.
