Ministrja e Arsimit, Besa Shahini, përmes një komunikimi online me drejtuesit e Drejtorive dhe Zyrave të Arsimit Parauniversitar, tha se dy javët e para të shkollës, e cila fillon zyrtarisht më 14 shtator, do të jenë përsëritje.
Kjo për të gjithë ata nxënës që kanë pasur mangësi gjatë mësimit në kushte shtëpie si pasojë e koronavirusit.
“Kemi bërë një riorganizim të planeve mësimore që dy javët e para të fillimit të vitit të ri shkollor, apo dy javët e fundit të shtatorit, do të jenë përsëritje, për të gjithë nxënësit që kanë marrë mësim në kushte shtëpie dhe që nuk ndihen me vetëbesim të plotë, që i kanë marrë mësimet në mënyrë të njejtë siç do t’i merrnin po të ishin në shkollë”.
Shahini bëri me dije se është gati edhe platforma për mësim online, pasi do të jetë e kombinuar, në shkollë dhe kur nevojitet do të zhvillohet mësim në kushte shtëpie.
“Paralelisht, kemi bërë dhe gjithë ndërtimin e platformës për mësim online dhe organizimin e punës për riorganizimin e punës për mësim në kushte shtëpie. Kjo do të na ndihmojë më shumë sidomos në zonat ku ndoshta shkollat nuk mund të punojnë me orar të plotë për të gjithë nxënësit dhe ata duhet të bëjnë mësim të kombinuar. Një pjesë në shkollë dhe disa lëndë në shtëpi me mësim online”.
Ministrja gjithashtu deklaroi se është ndarë buxheti i nevojshëm për të shtuar mësuesit në shkolla.
“Kemi ndarë edhe buxhetin e nevojshëm për të shtuar mësues nëse do të kemi nevojë për të mbuluar më shumë turne apo nëse kemi mësues që do duhet të marrin ditë të lira nëse nuk ndihen mirë”.
