Udhëzimi për hapjen e shkollave është i njëjtë si për institucionet arsimore shtetërore, por edhe ato private si edhe do të zbatohet për të gjithë njësoj në të gjithë Shqipërinë. Përfaqësuesja e Institutit të Shëndetit Publik, Marjeta Dervishi në një intervistë për Report Tv, e sheh të zbatueshëm në masën 100% këtë udhëzim, pavarësisht vështirësive që mund të hasen gjatë rrugës.
“Sigurisht ne kemi ndjekur rekomandimet e OBSH dhe të qendrës Europiane të Kontrollit të sëmundjeve për këtë udhëzues. Edhe gjatë fundvitit shkollor 2019-2020 ne patëm një udhëzues që u përshtat për maturat dhe pak a shumë ishim të përgatitur, por në këtë rast është punuar më tej për të krijuar një udhëzues për vitin shkollor 2020-2021. Është puna e ekspertëve tanë që kanë punuar për hartimin e këtij udhëzuesi. E dimë që te klasat e shkollat 9-vjeçare dhe të mesme është i lartë, por nëse do të punohet me turne, që do të përcaktojnë një grafik të caktuar apo përshtatjen e të gjitha ambienteve për t’i vënë në dispozicion ambiente ku do të zhvillohet mësimi. Është një udhëzues standard që do të respektohet nga shkollat shtetërore dhe private”, tha Dervishi.
Ajo ka dhënë detaje se si do të bëhet ulja e nxënësve në shkolla, teksa ka sqaruar edhe kategoritë e nxënësve që nuk do të mbajnë maskë.
“Për shkollat do të kërkohet që të ruhet distanca dhe më pas edhe gjatë orëve të mësimit do të respektohet, 1.5 m nga njëri- tjetri, metoda klasike e të ulurit të nxënësit, pas njëri- pas tjetrit. Këto element duhet të respektohen dhe këtu kemi të qartë që të respektohet kjo distancë duhet të ketë një numër të caktuar nxënësish në klasë dhe kjo do të bëhet me turne. Do të shoqërohen në hyrje dhe dalje nga mësues. Rekomandohet përdorimi i maskës edhe për ciklin e ulët, ndryshe nga cikli i lartë apo parauniveristar që do e kenë përdorimin e maskës gjatë gjithë mësimit. Mund të ketë fëmijë me sëmundje kronike apo sëmundje të tjera, do të vlerësohen nga mjekët në lidhje me përdorimin e maskës. Maska duhen mbajtur gjatë gjithë kohësh kur fëmijët të jenë në furgonin e shkollës dhe ka një rregullore dhe për transportin dhe kjo duhet të zbatohet. Jemi në një situatë të re”, tha ajo, teksa vuri theksin se ky udhëzim i është referuar rekomandimeve të OBSH-së.
