Një firmë argjentinase që po punon për prodhimin e 400 milionë dozave të vaksinës kundër COVID-19 nën kujdesin e kompanisë AstraZeneca, deklaroi se do të fillojë transportin e substancave aktive të produktit në Meksikë për të përfunduar të gjithë ciklin e vaksinës.
Drejtori i firmës farmaceutike mAbxience, tha se parashikon që produkti i përfunduar mund të shpërndahej në Amerikën Latine midis prillit dhe majit të vitit të ardhshëm. Sipas tij, vaksina do të kushtojë deri në 3 dollarë amerikanë.
Në fillim të javës, qeveria e Argjentinës tha se kishte rënë dakord të prodhonte me kompaninë e dytë farmaceutike në botë AstraZeneca, vaksinën kundër virusit, e cila po zhvillohet aktualisht në universitetin e Oksfordit. Ndërkohë, drejtori i përgjithshëm i AstraZeneca në Meksikë deklaroi në një konferencë për mediat se zhvillimi i vaksinës ndodhet tashmë në fazën e tretë dhe i gjithë procesi pritet të përfundojë mes fundit të nëntorit dhe fillimit të dhjetorit të këtij viti. Pas kësaj, kompania do të kërkojë aprovimet e qeverisë.
Njoftimet për prodhimin e një vaksine potenciale në Argjentinë dhe Meksikë ka rritur shpresat në Amerikën Latine, e cila regjistron afro një të tretën e vdekjeve dhe rasteve të infektimeve në nivel global, ndërsa vijon të jetë një nga pikat më të nxehta të COVID-19.
