“Jo vetëm modë” u moderua nga Floriana Garo për vite me radhë.
Kur ajo u zhvendos në Zvicër, dikush duhej të drejtonte.
Këtu hyri në lojë Nevina Shtylla.
Ky lloj zëvendësimi nuk i duket zëvendësim fare Nevinës. E ftuar tek “Mos i fol shoferit”, moderatorja tha:
“Kur bëhet një ndryshim i tillë, kur ndërrohet imazhi i emisionit, edhe vetë formula ka nevojë të ndryshohet. Kam përshtypjen që edhe vetë Floriana e ka pritur mirë sepse ndoshta nuk do të ishte e drejtë që dikush të merrte një punë që ajo e la, ta vazhdonte aty ku e la ajo. Nuk ndjej se e kam zëvendësuar sepse s’po bëj të njëjtën gjë. Është diçka krejtësisht e re, secila po sjell diçka ndryshe.”
Eh, sikur. Dy javë më parë, Floriana Garo dha në intervistë për “Bluetooth” dhe tha komplet të kundërtën:
“Më surprizoi si lajm, pasi unë isha autorja e emisionit, jo vetëm moderatorja. Nuk e mendoja që ai format mund të bëhet më njësoj, ndaj edhe emri duhej të ishte ndryshe, por këtë gjë e vendosi “Klan” që mbart patentën.”
Ja ku janë. Dy deklarata tërësisht kontradiktore. Ose Nevina s’ka dëgjuar ç’ka thënë Floriana, ose po i mëshon më tej idesë që emisioni ka ndryshuar.
Në të vërtetë, emisioni nuk është ide origjinale as e Florianës, as e Nevinës.
Është patentë e blerë nga Canale 5 dhe e përshtatur për audiencën shqiptare.
Në italisht quhet “Nonsolomoda”, transmetuar për herë të parë në 1984-n dhe për herë të fundit në 2012-n.
/anabel
