Në 9-vjetorin e ngjarjes së 21 Janarit, familjarët e Aleks Nikës vazhdojnë të apelojnë për drejtësi. Ata thonë se edhe sot, 9 vite më pas, drejtësia nuk është vënë në vend dhe ende nuk është bërë asgjë për zbardhjen e ngjarjes, ndërsa hetimet sipas tyre janë mbyllur duke e lënë ngjarjen në harresë. Për Mark Nikën, xhaxhanë e Aleks Nikës, Prokuroria e Tiranës ka fshehur të gjitha provat që implikojnë zyrtarët e lartë, duke shtuar se pas apelimit në Gjykatën e Strasburgut, SPAK do të detyrohet për të kryer hetime të sakta dhe të plota. Në një reagim për gazetën “SOT” ai deklaroi se mazhoranca aktuale i ka të gjitha kapacitetet e mundshme për të zbardhur masakrën e “21 Janarit”.
“Në datën 21 Janar të para 9 viteve në bulevardin Dëshmorët e Kombit u vranë 4 persona të pafajshëm nga dora e shtetit. Kjo ngjarje ka ngelur ende e pa zbardhur sepse dora e shtetit që i vrau ka pasur edhe drejtësinë, e cila prej kaq vitesh ka fshehur të vërtetën. Prokuroria e Tiranës ende nuk ka zbardhur të vërtetën duke i fshehur provat. Ne e kemi çuar këtë çështje në Gjykatën e Strasburgut dhe tani presim që kjo gjykatë të detyrojë SPAK që të bëjë hetime të plota. Mazhoranca tashmë i ka kapacitetet për të nxjerrë në dritë këtë të vërtetë që prej 9 vitesh nuk është zbardhur”, u shpreh Mark Nika.
Më tej ai deklaroi se ish-kryeministri Sali Berisha dhe kreu demokrat Lulzim Basha do të jenë ndër emrat e parë që do të dalin së shpejti para drejtësisë. “Ne kemi besim se SPAK dhe Byroja e Hetimit do të arrijnë të zbardhin këtë të vërtetë. Ne kemi besimin se të gjithë përgjegjësit e kësaj ngjarje do të dalin para drejtësisë, të gjithë ata që sot janë nëpër zyra apo kur ishin në Parlament, që nga Sali Berisha i cili ishte kryeministër në atë kohë, Lulzim Basha i cili ishte ministër i Brendshëm apo edhe ata që zbatuan urdhrat e tyre dhe vranë 4 njerëz të pafajshëm në bulevard. Shpresat tona janë të mëdha që shumë shpejt pa humbur kohë SPAK dhe Byroja e Hetimit do të zbardhin ngjarjen e plotë”, u shpreh Mark Nika në reagimin e tij për gazetën.
