Në ceremoninë përkujtimore të dëshmorëve të rënë 75 vite më parë për çlirimin e Tiranës, zv.kryeministri Erion Braçe ka sulmuar edhe opozitën jashtë parlamentit.
Braçe tha se ata kanë zgjedhur të jenë kundër SHBA-ve, Britanisë e Francës, pasi pretendon se opozita janë kundër perëndimit dhe se duan vetëm pushtet.
“Ata pushtetarë i shpallin luftë SHBA, i shpallin luftë Britanisë, i shpallin luftë Francës, me një akt turpi në mbështetje të fashizmit, kundër popullit të tyre. Po e përsërisin veten prap sot, që për interesa partiake të vetat, të ngushta por edhe për pak pushtet t’i shpallim po prap luftë Amerikës, Britanisë, Francës, gjithë perëndimit, thjesht dhe vetëm se duan pak pushtet. Edhe atëherë pushteti i bëri bashkë me fashizmin, edhe tani pushteti i bën bashkë kundër perëndimit. Ne antifashizmin nuk e kemi të përkohshmëm, e kemi të qartë, e kemi zgjedhje të përkohshme. Sa herë duan pushtet të pakontrolluar, sa herë duan pushtet për të shmangur atë që është themelore, për të shmangur drejtësinë. Pushtetarët që dhanë jetën për flamur dhe atdhe meritojnë respekt. Nder dhe respekt çdo familjeje”, deklaroi Braçe.