Institucionet publike shëndetësore në Kosovë kanë në dispozicion vetëm 92 autoambulanca, në mungesë të së cilave shpesh rrezikohet edhe jeta e pacientëve. Por tashmë është vendosur që të shpenzohen edhe 7.2 milionë euro nga buxheti i shtetit për marrjen e 358 makinave me qira, ndonëse në dispozicion janë mijëra makina për stafin e nivelit qendror dhe lokal, shkruan sot gazeta “Zëri”.
Institucionet e Kosovës kanë ndarë një buxhet prej më shumë se 7.2 milionë eurosh për t’i marrë me qira 358 makina, të cilat do t’i shfrytëzojnë për 66 muajt e ardhshëm.
Por, një vendim të tillë nuk po e marrin edhe për blerjen e autoambulancave, për të cilat kanë nevojë pacientët e institucioneve publike shëndetësore.
Në shërbim të pacientëve në të gjithë Kosovën janë në dispozicion vetëm 92 autoambulanca, ku disa qendra kryesore të mjekësisë familjare kanë vetëm një autoambulancë dhe kur kërkohet të ndërhyhet në dy raste të njëhershme, atëherë rrezikohet edhe jeta e qytetarëve, ndërsa institucionet e vendit vlerësohet se kanë në dispozicion mijëra makina për shërbyesit civilë.
