5 vite nga Reforma në Drejtësi ka mbledhur në një tryezë të përbashkët ministren e Drejtësisë, Etilda Gjonaj si edhe krerët e institucioneve të reja, mes tyre Gent Ibrahimi nga KLP, Naureda Nallbani e KLGJ, Arben Kraja nga SPAK, Kryeprokurori Olsian Çela etj. Në takim do jetë edhe ambasadorja Yuri Kim si edhe ambasadori Luigi Soreca, ku SHBA-BE kanë luajtur një rol thelbësor në miratimin e kësaj reforme me 140 vota të plotë në Kuvend. Kjo tyrezë nis në orën 10:00 dhe përfundon në 12:30.
21 korriku ishte përcaktuar nga SHBA-BE dhe mazhoranca si momenti vendimtar për miratimin e reformës në drejtësi. Mirëpo, negociatat e gjata si rrjedhojë e klimës së mosbesimit mes palëve dhe kërkesat e njëpasnjëshme të opozitës në përpjekje për të zvarritur reformën, bënë që kjo reformë të mbajë datën e miratimit 22 korrikun. Reforma u votua ekzaktësisht në orën 00:46 minuta të 22 korrikut me vendim unanim të Kuvendit të Shqipërisë, pasi pro paketës së ndryshimeve Kushtetuese shkuan 140 vota, aq sa ka anëtarë Kuvendi. Konsensusi për reformën u arrit në mesditë, kur mazhoranca dhe opozita pranuan propozimin e ri të ambasadorëve Lu e Vlahutin, për formulën e zgjedhjes së anëtarëve të KLGJ dhe KLP.
