Vrasja e djeshme e avokatit të Çapjave Ravik Gurra tronditi qytetin e Elbasanit por jo vetëm. 50-vjeçari ishte duke pirë kafe rreth orës 19.35 në një nga lokalet në qendër të qytetit kur një person i është afruar dhe ka qëlluar me një pistoletë me silenciator mbi të, duke e lënë të vdekur në vend. Kjo javë ka qenë një javë e përgjakshme, me 5 të vrarë me armë zjarri nga e premtja në të premte.
AlpeNews.al ju sjell të gjitha ngjarjet që tronditë Shqipërinë, nga ish- i përndjekuri Baçinozi, te menaxheri i VIP-ave, furrxhiu deri te Nardi i Bujtinave dhe avokati.
Çfarë ndodhi dje:
22 mars 2019- Vritet Ravik Gurra
Ekzekutohet në mes të Elbasanit avokati Ravik Gurra. 50-vjeçari ishte duke pirë kafe rreth orës 19.35 në një nga lokalet në qendër të qytetit kur një person i është afruar dhe ka qëlluar me një pistoletë me silenciator mbi të, duke e lënë të vdekur në vend. Avokati ka përfaqësuar në disa gjyqe, Emiliano Shullazin dhe pjesëtarë të familjes Çapja të Elbasanit.
15 mars 2019- Vritet Esat Kotorri
Esat Kotorri, pronari i një furre buke në Kavajë u qëllua me çifte orët e para të mëngjesit sapo kishte shkuar të hapte biznesin. Autori i dyshuar i ngjarjes është një 26-vjeçar, i cili u vu në pranga nga Policia e Kavajës, vetëm pak kohë pasi kishte plagosur 59-vjeçarin. Pak ditë më pas, i plagosuri do të ndërronte jetë në spital, citon lapsi.al. Dyshohet se motivi i krimit është një konflikt i hershëm pronësie mes pronarit të furrës së bukës dhe familjes së autorit.
16 mars 2019- Vritet Haxhi Baçinozi
Një ditë më pas do të tronditje Tirana. Një vrasje ndodhi rreth orës 18:15 në një nga zonat më të frekuentuara siç është Liqeni Artificial i Tiranës. Vritet 62-vjeçari Haxhi Baçinozi nga fshati Radostinë i Fierit. Ai ka qenë duke vrapuar me djalin e tij në momentin që është ndeshur me Islam Mylkajn. Të dy kanë shkëmbyer fyerje dhe sharje për shkak të një borxhi prej 46 mijë eurosh që autori nuk i kishte kthyer prej 20 vjetësh viktimës.
18 mars 2019-Vritet Jurgen Kurti
Dy ditë më pas një krim tjetër i rëndë do të shokonte kryeqytetin. Në “zemër” të tij u ekzekutua Jurgen Kurti, i njohur si menaxheri i VIP-ave. Ai u qëllua për vdekje në afërsi të banesës së tij në rrugën “Zef Jubani”. Kurti sapo kishte dalë nga një palestër kur u qëllua nga persona ende të paidentifikuar. Policia nuk ka ende një piste të qartë për arsyet e krimit.
20 mars 2019-Vritet Ferdinand Polia
Vritet në fshatin Grudë të Shkodrës biznesmeni Ferdinand Polia, i cili kishte në pronësi bujtinën Polia në zonën turistike të Thethit. I njohur për të gjithë si “Nardi i bujtinave”, 35-vjeçari u qëllua me breshëri duke udhëtuar me automjetin e tij tip fuoristradë. Polia është dërguar në spital ku dhe ka ndërruar jetë pasi nuk ka mundur t’i mbijetojë plagëve të marra.
Përgatiti: AlpeNews.al
