Nga Milan-Parma e deri te Juventus-Milan, e thënë ndryshe 17 javë kampionat. Në këtë hark kohor Milani nuk ka marrë asnjë 11- metërsh në favor, teksa penalltia e fundit i përket pikërisht sfidës me Parmën kur shënonte Frenk Kesi. Që nga ai 2 dhjetor i vitit të kaluar, kuqezinjtë nuk janë paraqitur më në pikën e bardhë. 17 ndeshje janë thuajse një fazë kampionati, por ato që e errësojnë këtë statistikë të “Djallit” janë dy transfertat e fundit.
Në Xhenovë ndaj Sampdorias, e sidomos në Torino në fundjavën që lamë pas, Milani numëron të paktën tre penallti të padhëna. Me vetëm dy goditje në të gjithë sezonin aktual të Serisë A nga pika e bardhë, Milani ndodhet në fund të renditjes për penallti të dhëna. Këtë “rekord” kuqezinjtë e ndajnë me Parmën dhe Kaljarin, dy ekipet e vetme që kanë ngecur në kuotën e dy penalltive të dhëna në 31 javë kampionat.
REINA
Duke qëndruar te 11- metërshat, Pepe Reina ka folur për episodin e pjesës së parë kur një faull me dorë nga Aleks Sandro kaloi pa u ndëshkuar nga arbitri dhe VAR-i.
Portieri i Milanit ka pranuar se i ka kërkuar shpjegim Majkëll Fabrit, teksa në një deklaratë për televizionin e klubit ka thënë: “I kërkova arbitrit shpjegime për mosdhënien e penalltisë kur Aleks Sandro ndali me dorë krosimin e Çalhanoglusë. Nëse pyesim dhjetë njerëz për atë episod, nëntë do të të thonë që është 11-metërsh.
Nëse asistentët të thonë që duhet të konsultohesh me pamjet në VAR, patjetër që ka një arsye të fortë. Kur një arbitër merr ndihmën e teknologjisë, në 9 nga 10 raste ndryshon vendimin e marrë në fushë. I thashë zotit Fabri që duhet të fliste me kolegët e tij në mënyrë që vendimet për rastet kur topi preket me dorë të jenë uniforme. Sipas mendimit tim, Aleks Sandro mbulonte me krahun e tij një hapësirë që nuk mund ta mbulonte me trup. Ajo ishte një penallti e qartë, në Torino, Milano apo kudo tjetër”.
OBJEKTIVI
Pas “sqarimit” në lidhje me episodin kyç në ndeshjen me Juven, 35-vjeçari ka folur edhe për objektivin e Milanit deri në fund të sezonit. “Ndaj vendimeve të arbitrave nuk ka asnjë ilaç, ndaj duhet të bazohemi te paraqitja jonë ndaj Juventusit për të ndërtuar fitoret në ndeshjet e radhës. Synojmë të mbërrijmë në katërshen e parë dhe na mungojnë shtatë ndeshje në të cilat do të bëjmë të pamundurën”, përfundoi Reina.
