Mbi 300 të vdekur dhe mbi 100 të plagosur. Është ky bilanci tragjik i sulmit më vdekjeprurës në historinë e Egjiptit modern, që goditi gadishullin e Sinait të premten.
Shënjestër e sulmit me bombë e armë zjarri, u bë xhamia Al Rawda në Bir Al Abed, pikërisht kur po zhvillohej falja e të premtes. Sipas dëshmitarëve, dhjetëra agresorë që mbërritën me automjete, bombarduan xhaminë e mbushur plot me njerëz, para se të hapnin zjarr ndaj besimtarëve.
Imazhet nga vendi i ngjarjes ishin rrëqethëse dhe treguan radhë të tëra me trupa të përgjakur brenda vendit të shenjtë. Spitalet u dyndën nga personat e plagosur. Presidenti egjiptian Abdul Fatah Al Sisi u zotua se do t’i përgjigjej me forcë brutale masakrës, pas bisedimeve me zyrtarë të sigurisë.
Ai shpalli 3 ditë zije kombëtare. Deri më tani, asnjë grup nuk ka marrë përsipër autorësinë e sulmit, por militantë që kanë lidhje me Shtetin Islamik, kanë qenë përgjegjës për një sërë sulmesh që kanë goditur gadishullin.
Megjithatë, ata zakonisht shënjestrojnë kisha, prandaj ky sulm i përgjakshëm në xhaminë që përdoret nga komuniteti i myslimanëve Sufi, ka tronditur Egjiptin. Një degë mistike e Islamit Sunit,Sufizmi pranohet gjerësisht rreth botës myslimane, por disa grupe xhihadiste, përfshirë edhe ISIS-in, i shohin ndjekësit e tij si heretikë.
I gjithë komuniteti ndërkombëtar, përfshirë presidentin amerikan Donald Trump dhe kryeministren britanike Theresa May, dënuan me termat më të ashpër sulmin.
Mesa duket qellimi ishte nje dhe i vetem. Te shfarosnin sa me shume.
“Ata po qëllonin mbi njerëzit serish kur u larguan nga xhamia”, tha një banor vendas, të afërmit e të cilit ishin në vendngjarje. “Ata po qellonin edhe ambulancat”.
Zyra e Presidentit egjiptian Abdelfattah El-Sisi ka shpallur tri ditë zie. Ai tha se megjithëse sulmi kishte për qëllim lëkundjen e besimit të egjiptianëve, ai vetëm do të rrisë përpjekjet e vendit për të luftuar terrorizmin, sipas Al Arabiya.
Ndërkohë, presidenti rus Vladimir Putin ka shprehur ngushëllimet e tij per presidentin egjiptian, duke e përshkruar sulmin e së premtes si mizor dhe cinik.
“Vrasja e civilëve gjatë një riti fetar është e habitshme me mizorinë dhe cinizmin e saj. Ne jemi edhe njëherë të bindur se nocioni i moralit njerëzor është absolutisht i huaj ndaj terroristëve”, tha Putin.
Presidenti i SHBA Donald Trump e përshkroi sulmin si “frikacak”, duke theksuar se bota duhet të mposhtë terroristët ushtarakisht.
