ITALI- Ka nisur këtë javë gjyqi kundër klanit mafioz të shqiptarëve që merreshin me trafik droge dhe prostitucion. Mësohet se gjyqi po mbahet në Gjykatën e Biellës, ku një meritë të veçantë ka super prokurori Onelio Dodero. Hetimi për bandën nisi në vitin 2001-in dhe për arrestimin e tyre u deshën më shumë se rreth 30 mijë përgjime telefonike.
Seanca e kësaj jave ishte në lidhje me 7 prej të pandehurve shqiptarë, pasi në total si grup janë 20 persona të përfshirë, që janë zbuluar si pjesë e bandës. ‘La Stampa’ shkruan se karabinierët kishin zbuluar dy bazat për trafikimin e drogës, në rrugën Battisti dhe rruga Trento, menaxhuar nga një grup shqiptarësh që zbuluan rastësisht në Biella. Pas disa vitesh kishin zgjeruar aktivitetin kriminal edhe jashtë kësaj province, por duke mbajtur një lidhje me territorin.
HETIMET
Gjithçka nisi në vitin 2001, për t’u konkluduar me arrestimin e 20 personave. Kjo bandë trafiku kishte si bazë kryesore Macerata, ku vinin ngarkesat e drogës nga Shqipëria, ndërsa thuhet se bëhej fjalë për më shumë se 100 kg heroinë dhe kokainë. Po ashtu ky grup akuzohet edhe për prostitucion. ‘La Stampa’ shkruan se shqiptarët nuk kursenin as dhunën për t’i detyruar këto vajza që të prostituonin. Madje shqiptarët detyronin këto vajza që të abortonin në mënyrë të tillë që të dilnin në rrugë sërish. Për të siguruar provat e mjaftueshme për këtë bandë, u bënë 30 mijë përgjime telefonike.
