Detaje të reja janë zbardhur nga superoperacioni i policisë i një dite më parë, ku u bllokua sasia rekord e mbi 4 milionë eurove në Portin e Durrësit.
Deri dje prokuror i kësaj dosjeje ishte Sokol Nishani, vëllai i ish-Presidentit të Republikës, Bujar Nishani, i zgjedhur nga radhët e PD. Ndërkohë, sot mësohet se çështja ka kaluar në duart e Ornela Rrumbullaku, e cila është përgjegjëse e strukturës së Taskë Forcës në Durrës.
Është pikërisht ‘Forca e Ligjit’, që do të hetojë këtë dosje të nxehtë, e cila u dekonspirua nga kryetari i Partisë Demokratike, Lulzim Basha, tri ditë më parë në Kuvend.
NGJARJA
Policia Kufitare e Portit të Durrësit ka arritur të numërojë të gjithë paratë e gjendura mesditën e djeshme në një kamion, pronar i të cilit mësohet se ka qenë Edi Çani.
Çani sëbashku me të birin e tij, 20-vjeçarin Klevis Çani ishin kthyer nga Belgjika duke marrë tragetin e linjës Adria nga Ankona për në Durrës.
Ata kanë udhëtuar gjatë gjithë kohës me një makinë tip ‘Toyota Yaris’ dhe kanë mbërritur në destinacion rreth mesditës së djeshme.
Djali i tij i cili figuron si i ati me dy mbiemra dyshohet se ka qenë një bashkëshoqërues i shoferit të makinës, i cili akoma mbetet i panjohur për publikun.
Nga numërimi i plotë i Policisë Kufitare dalin se në makinën ‘Toyota Yaris’ kanë qenë të fshehura 3 milionë 470 mijë euro.
Mbrëmjen e djeshme Policia njoftoi se këto para nuk janë të falsifikuara por kishin destinacion Shqipërinë.
Ndërkohë që janë arrestuar që ditën e djeshme Edi Çani (Lika) – Pronar i Autoservisit dhe Kompanisë së ngarkim-shkarkim mallrave ‘EDI LIKA’, 20-vjeçari djali i tij, Klevis Çani (Lika), dhe shoferi i kamionit, emri i të cilit akoma nuk bëhet i ditur nga autoritetet.
