Për të përcaktuar me saktësi vendin e origjinës ku janë blerë makinat, në dy prej të cilave u bllokua sasia prej 3.4 milionë eurosh, Policia e Shtetit ka kërkuar bashkëpunimin e Policisë belge.
Të dhënat që mund të vijnë nga Belgjika janë një ndihmë për grupin hetimor, në mënyrë që të arrihet identifikimi i personave të tjerë që mund të jenë përfshirë në ngjarje. Burime nga Policia thanë se për të zbuluar më tepër detaje rreth çështjes, ka nisur shkëmbimi i informacioneve me agjencitë homologe belge, gjermane dhe italiane.
Një informacion i detajuar policor i është nisur për dijeni Policisë belge, nga ku kërkohet ndihma për hetimet e nisura tashmë nga Prokuroria e Durrësit. Policia Shqiptare kërkon të dijë me saktësi vendin ku janë ngarkuar makinat në Belgjikë, që më pas udhëtuan drejt Gjermanisë, Italisë dhe më pas mbërritën në Portin e Durrësit.
Burimet thanë se ka dyshime të arsyeshme se përveç kushërinjve Alfred e Elvis Vladi, në emër të të cilëve ishin “Toyotat” me 3.4 milionë euro, mund të ketë edhe persona të tjerë të përfshirë në këtë skemë të pastrimit të parave.
TE KERKUARIT
Policia ka vijuar edhe dje kërkimet për dy të shpallurit në kërkim si porositës të sasisë rekord të eurove, Elvis dhe Alfred Vladi, vendndodhja e të cilëve ende nuk dihet. Burimet thanë se nga verifikimi në sistemin Tims nuk figuron që dy kushërinjtë Vladi të kenë përdorur ndonjë pikë kufitare për të dalë jashtë Shqipërisë.
Nuk përjashtohet mundësia që ata mund të jenë “arratisur”, në mënyrë ilegale, por dyshimet e Policisë janë se ata fshihen në Shqipëri. Megjithatë, për çdo rast, të dhënat dhe fotografitë e dy të kërkuarve janë shpërndarë në të gjitha pikat e kalimit kufitar, në mënyrë që në rast se ata do të tentojnë të largohen, të vihen në pranga menjëherë.
DEKONSPIRIMI
Drejtoria e Standardeve Profesionale në Policinë e Shtetit ka nisur procedimin disiplinor për disa efektivë të Policisë Kufitare Durrës dhe Krimit Ekonomik. Ende nuk dihet nëse hetimi administrativ po kryet për informacionet e nxjerra në media apo ka dyshime për rrjedhje të informacioneve para se të ndaloheshin “Toyota” me 3.4 milionë euro.
Policia e Shtetit pretendon se ajo ka disponuar e para informacionin në rrugë operative nga burimet e saj, por fakti është që një tjetër institucion ka pasur dijeni për sasinë e madhe të parave që do hynin ilegalisht në Shqipëri.
Në deklaratën zyrtare për operacionit, Policia tha se një agjenci ligjzbatuese vendase, që duket se i referohet Shërbimit Informativ Shtetëror, i ka sinjalizuar disa orë pasi fakti është bërë publik në sallën e Kuvendit, më 21 qershor. Ndërsa vetë Policia ishte në dijeni, përmes burimeve të saj vendase, që një ditë më përpara. Për rrjedhjen e këtij informacioni mësohet se edhe Prokuroria ka nisur një hetim paralel, krahas atij për 4 personat e arrestuar dhe 2 të tjerëve që janë shpallur në kërkim.
