Takimin përmbyllës të fushatës elektorale drejtuesi politik i Partisë Socialiste për Qarkun e Tiranës, Erion Veliaj, e ka zhvilluar në njësinë numër 8. Kryefjala e këtij aktiviteti ishin spotet elektorale të Partisë Demoratike.
“Luli duhet të jetë shumë në siklet kur bën atë spotin tek sheshi “Skënderbej”. Por kur e shoh që del i gëzuar aty them: A ke turp! A ke cipë! ….a kanë pasqyrë në shtëpi, se njeriu e sheh veten dhe thotë, “ndoshta duhet t’iu kërkoj ndjesë njerëzve që sheshin “Skënderbej” e lashë si kartodrom ndoshta duhet t’iu kërkoj ndjesë se tek këndi i lodrave po kënaqen të gjithë fëmijët”
Veliaj ka akuzuar edhe Presidentin e Republikës, Ilir Meta, si i vetmi kryetar shteti që edhe në fushatë elektorale bën politikë dhe përfshihet në incidente.
“Ata shërrosen mes tyre, duan të gjejnë alibi për humbjen, shkon dhe Ilir Meta aty. Ata zihen për parkim, edhe Ilir Meta shkon aty si roje parkingu. Shkon tek ndërtesa e Bashkisë që ka zaptuar një parti pa vota, pa deputetë, shkon si përmbarues”
Votën për Edi Ramën në këto zgjedhje, Veliaj e kërkoi edhe njëherë si mundësi për të vijuar punët e nisura.