Një 23-vjeçare shqiptare humbi jetën tragjikisht në SHBA, pasi u rrah barbarisht nga bashkëshorti i saj. Prindërit e Elena Alinj, 23-vjeçares shqiptare si dhe të afërmit e saj në Shqipëri, nuk kishin para për të mundësuar kthimit e trupit në atdhe, ku edhe do t’i bëhet varrimi.
Mbi ngjarjen tragjike një e afërme e Elenës kërkoi të mblidhte fonde, përmes “gofundme” dhe ishin të shumtë, kryesisht të komunitetit shqiptar në SHBA, ata që i erdhën në ndihmë familjes në këto ditë të vështira. Me qindra qytetarë kanë ndihmuar familjen e vajzës me para përmes “gofundme”, në mënyrë që trupi i saj të kthehet nga SHBA dhe të prehet në Shqipëri.
Deri më tani janë grumbulluar 75 mijë dollarë në “gofundme”, një shumë kjo e mjaftueshme, që do të bëjë të mundur transportimin e trupit të Elenës nga SHBA-të drejt Shqipërisë.
Sipas disa raportimeve 23-vjeçarja, e cila kishte emigruar disa vite më parë në SHBA, ishte martuar me një shtetas të huaj, me origjinë meksikane, me të cilin kishte edhe fëmijën, por u rrah barbarisht prej tij, duke humbur jetën pak ditë më parë.
Për shkak të hetimeve dhe ngjarjes së rëndë, policia në SHBA, pas arrestimit të bashkëshortit të saj, nuk ka dhënë detaje, mbi ngjarjen dhe rrethanat.
Përfaqësuesja e familjarëve të së ndjerës, e cila bëri edhe kërkesën, pas vrasjes së 23-vjeçares, ka shprehur falënderimet e saj dhe ka treguar disa detaje të reja në lidhje me situatën aktuale.
“Së pari, në emër të familjes Alinj ju falenderojmë përzemërsisht për mbështetjen që keni treguar. Nuk gjejmë fjalë të përshkruajmë mirënjohjen për secilin nga ju që jeni treguar bujarë nëpërmjet donacioneve dhe që na keni dhënë mundësinë të ndajmë këtë tragjedi me ju”, shkroi familjarja e Elenës.
