Ditën e sotme po zhvillohet ceremonia përkujtimore e dy vjetorit të vdekjes së Konstantinos Katsifas i cili u vra nga forcat RENEA në Bularat gjatë një shkëmbimi zjarresh.
Në ceremoninë përkujtimore kanë marrë pjesë familjarët, të afërmit dhe përfaqësuesit e OMONIA-s.
Kunati i Kacifas, Vangelis Sakellarakis është shprehur se ai e bëri këtë edhe për shqiptarët pasi në vend nuk ka demokraci.
“Ai nuk e bëri vetëm për vete, por edhe për grekët dhe shqiptarët, pasi në këto vende mungon demokracia. Ai kërkonte demokraci,” është shprehur kunati i Kacifas.
Ndër të tjera ai është shprehur se çështja e Konstadinos Kacifas është dërguar në Gjykatën Evropiane dhe do të shqyrtohet atje.
Ndërkohë edhe pse kanë kaluar dy vjet që nga vdekja e ekstremistit grek, banorët deklarojnë se prej ditësh forcat e policisë shqiptare po monitorojnë lëvizjet e familjes Kacifas.
Kujtojmë që Konstandinos Kacifa në 28 tetor të 2018 qëlloi mbi policinë shqiptare me breshëri kallashnikovi, ditën kur në Bularat po mbahej ceremonia për rivarrimin e ushtarëve grekë. Situata u tensionua dhe grupet Renea u nisën menjëherë nga Tirana për të marrë në dorë kontrollin e situatës. Gjatë shkëmbimit të zjarrit, Kacifas mbeti i vrarë.
