Fjalën e tij gjatë rinisjes së fluturimeve në aeroportin e Kukësit kryeministri Edi Rama e nisi me një batutë me djemtë e Londrës. Ai tha se përpos tre shteteve ku do të nisin fillimisht fluturimet Wizzair synohet edhe Britania e Madhe. 4 destinacionet e para do të jenë drejt Austrisë, Gjermanisë dhe Zvicrës, fillimisht nga dy herë në javë.
Rama shtoi se nuk do i ndahet Kukësit derisa djemtë e Londrës të kenë fluturimet e tyre me tarifa simbolike. Ai u ndal te akuzat e shumta duke theksuar se në fund fjalët i merr era dhe fjalët e mira mbeten, ndërsa theksoi se kosto e udhëtimit me Wizzair do jetë vetëm 19 euro.
“Destinacioni tjetër i rëndësishëm është Anglia. Unë nuk do I ndahem Kukësit derisa djemtë e Londrës nga Kukësi të kenë fluturimet e tyre me tarifa krejtësisht simbolike. Në fund fjalët i merr era dhe punët e mira mbeten. Jam besimplotë që ky aeroport ka një të ardhme fantastike. Dua ta falenderoj drejtorin për gatishmërinë për ta parë Kukësin si mundësi. Në fillim ishte pak skeptik. Sot është një ditë e bukur me diell dhe dëborë.
Jam i kënaqur që sot jemi për t’i dhënë një mundësi të re banorëve jo vetëm të Kukësit por të një treve të tërë që përfshin edhe pjesën matanë bjeshkëve duke hapur 4 destinacione. Austri, Gjermani dhe Zvicër. Janë tre vende me katër destinacione dy herë në javë. Çmimet janë 19 euro për secilin destinacion. Sot mund të shohim si ka ndryshuar panorama e çmimeve falë reformave të bëra”, tha Rama.
