Operacioni “Start” i policisë spanjolle, DEA-s dhe EUROPOL ku u arrestuan 2 bosët shqiptarë të trafikut të kokainës me 1 ton drogë dhe 1.55 milion euro cash, është shtrirë dhe në Shqipëri. Policia dhe Prokuroria e Krimeve të Rënda kanë nisur verifikimet e pasurisë për dy shqiptarët të cilët sipas policisë spanjolle janë në krye të këtij grupi kriminal.
Burimet kanë sqaruar përfundimisht identitetin e tyre: Arjan Ndoci, 45-vjeç me origjinë nga Laçi por banues në Tiranë, fillimisht kishte paraqitur një pasaportë fals me identitet të Dritan Gradica, djali i një ish-gjyqtari që jeton në Londër, por që nuk rezulton të ketë asnjë lidhje me trafikun.
Shqiptari i dytë i kapur në Madrid quhet Julian Deblini, 35 vjeç, lindur dhe banues në Lezhë. Materialet i janë referuar Krimeve të Rënda dhe verifikimet po kryhen në bazë të ligjit anti-mafia ku do të përfshijnë jo vetëm dy personat por dhe lidhjet e tyre familjare.
Zyrtarisht Julian Dublini nuk figuron as në regjistrin kombëtar të shtetasve as dhe në atë të bizneseve në vendin tonë.
Report Tv siguron ekskluzivisht foton e Deblinit i cili u prangos në Spanjë. Ndërsa Arjan Ndoci rezulton se është vëllai i biznesmenit të njohur Viktor Ndoci. Në sitën e verifikimeve do të kalojnë ne fakt të gjitha pronat e familjarëve të Arjanit, përfshirë edhe ato të vëllait të tij biznesmenit të Viktor Ndocit njohur si biznesmeni i një nga Qendrave Tregtare të rëndësishme në kryeqytet dhe pronar e shumë pallateve.
Vetë Arjan Ndoci nuk ka pronësi biznese në Shqipëri, ndërsa rezulton se vite më parë ka pasur në pronësi kompaninë Arvi të cilën e ka shitur tek persona të tjerë kundrejt 12 mln lekëve.
Verifikimet sipas burimeve për Report Tv nga Krimet e Rënda do të kryhen në zyrat e hipotekës, bizneset, bankat e nivelit të dytë, pronësitë mbi automjetet dhe agjencitë e transfertave dhe këmbimeve valutore. Pas verifikimeve nga policia dhe prokuroria dosja do kalojë në Gjykatë për vënien e pasurive nën sekuestro.
